對於男人而言，個個都去韓國，唔通個個都想去韓國咩？相信十個男士，有九個去韓國不外乎以下幾個原因︰另一伴被迫去、機票夠平、亞洲鄰近地區已經去到悶。不過好多朋友浸完幾日泡菜之後，就誓神劈願唔再去韓國，話對炸雞、一陣燒肉味都有恐懼。其實，難得與另一半或者成班好友去旅行，再難得航空公司無取消你班客機，已經值得劏雞還神。好地地去旅行何謂搞到滿肚火，所以今次「男紙」先介紹較為悠閒的釜山，其實只要行程計劃得好，男女都可以去旅行，去到盡。
輕易買限量版
女生去韓國瘋狂shopping是常識吧？男人去韓國同樣可以買到好多好嘢，如果你想買限量版潮物，去韓國就無錯喇，因為韓國人唔似我地咩都鍾意排一餐，好多大型商場的店鋪唔會出現一有新貨上架就幾秒被炒家清空下架的情況。以筆者為例，早前去到釜山南浦洞的樂天百貨，當時剛剛出了UNIQLO X J.W. Anderson的聯乘系列，怎料每層貨架完全……無人買過咁際。相反在香港的朋友在銅鑼灣利舞台排了足足一小時，最後只剩下不合size的籮底橙。不過亦要謹記，韓國有好多假貨，識買就一定要去大型商場買。
去汗蒸幕釋放壓力
汗蒸幕是韓國人常去的「聚腳點」，不少旅客都會光顧汗蒸幕。汗蒸幕是一種韓國特有的沐浴設施，可以加速血液循環，將毒素排出。據說《Running Man》的大隻型男金鐘國一星期要去汗蒸幕兩至三次，排汗當做運動。香港人日忙夜忙，好多時抽時間跑個步、踢個波都難，做汗蒸幕的好處正正是可以釋放壓力。釜山的Spa Land和Hill Spa都是值得去的汗蒸幕，兩間都是男女共用，前者在Centum City站，位於新世界百貨 (Shinsegae Centum City)之內，可以順道購物；後者面對海雲台，擁有無敵大海景。
吃肉獸的天堂
香港的韓國食店多到琳瑯滿目，不過消費甚高，以喜來稀肉為例，釜山的人均消費就平香港一半都有，情況就好似香港的「海底撈」比內地貴一截。如果是無肉不歡的朋友應該視韓國是美食天堂，只要略略一提機張螃蟹餐、豬肉湯飯、炸雞、機張螃蟹餐、烤章魚、嫩豆腐鍋和人蔘雞湯等等，相信大家個肚都開始打鼓，韓國美食有好多，其實都係睇你識唔識食，做男人唔係話自己唔識食掛？
體驗韓式夜生活
如果成班單身男士去韓國，要認識韓國女生，最直接方法當然要喜愛夜蒲，釜山地鐵「西面站」是好多地鐵線的交會點，所以開設好多餐廳和酒吧，韓國女生都是「愈夜愈西面」，統統來到這裡逛逛走走。如果與另一伴去夜店的話，不妨透過酒精重燃彼此的激情；又或者去一去賭場碰下運氣，女生不喜歡賭不緊要，因為樂天店的七星賭場由李敏鎬做代言人，有無限個一比一男神紙版加持，你有你小賭怡情，佢有佢玩老虎機，成件事幾happy。
圖片來源︰互聯網