一套《蝙蝠俠對超人︰正義曙光》，似乎將DC個牌頭打到體無完膚，DC Fans睇到呱呱叫，對家Marvel睇到陰陰笑，要挑戰本尊地位？磨多兩年劍先啦！
(睇企位，Lady First好，講吸引度好，都係Wonder Woman啦！)
一套《神奇女俠》，講唔上絕妙，但勝在故事穩穩陣陣，最緊要有個靚女姬嘉鐸（Gal Gadot）養眼現身，故事再左膠都可以照單全收。而這亦成為真正的DC曙光。
搞幾年，都係想搞個《正義聯盟》登場，在欠時間鋪排，冇獨立角色電影支持下，《正義聯盟》的主打只能放在神奇女俠身上，等佢一姐當關救全家。事實上每當她發功後報上的微笑，威力都比佢發功更勁， 而導演都好男性主導，加入大量大頭Shot滿足大家。
(戲中表現，神奇女俠的能力僅次於超人。)
整套戲驚喜不大，就似舊朋友聯誼聚會頭一個鐘，禮禮讓讓寒喧問暖，逐一介紹近況，到混熟了已經夠鐘散場。閃電俠設定如蜘蛛俠，插科打諢搞爛gag，由蝙蝠俠負責監管；水行俠自我中心膨脹，志在為團隊帶來矛盾衝突；鋼骨有悲慘的故事背景，可加以發展，但今集只是位科技支援組同事。向來乏善足陳的超人，今集復活後失憶，跟隊友內哄對決一場反而精彩，正好說明正義角色太正義就係悶，要融入暗黑元素先有發展水位。
(水行俠將會有獨立電影，今集當同大家熱身先。)
至於蝙蝠俠，完全是崩壞了。預告片中他被問及有甚麼超能力，佢答︰「I am Rich！」以為幾抵死風趣，但入到戲軌，佢原來真係窮得只有錢。明白各人都有超能力，你一個凡人著件衫靠自製武器實在難比較，但編劇大可將他描寫成一支隊伍的領軍、精神領袖、帶隊、召集人，甚至導遊都好吖！但現在就只係一名旅行團司機，管接管送，優點係唔會問拎貼士。
(Ben Affleck飾演的蝙蝠俠，周圍去說人加盟，靠把口搵食。)
更睇唔過眼係堂堂大英雄一名，在主要戰役中埋唔到大佬身不特止，只負責對付旗下成千上萬的嘍囉的其中一隻，眼見神奇女俠輕鬆地一刀兩件的對手，蝙蝠俠要排除萬難，又跌低又冇子彈又呢又路先搞掂一隻咁大把，功力層次如同復仇者聯盟的鷹眼般，甚至更劣。話說往後仲會有蝙蝠俠獨立電影，叫Fans們情何以堪？