雙掌合十，佛教動作。如果不是佛教徒，又不是真心想表達合十的本意，無端端雙掌合十，很造作，一種說不出的造作，做乜啫你，emoji合十咩？看到鄧家彪的合十，更加想問：「做咩啫你！」雙掌合十的意思眾多，主要代表和平友好、團結合作的意思。赤手空拳，或者尚可一戰，但雙掌相合，則代表全無傷人之意。
只不過，鄧家彪的合十，印於立法會補選宣傳相。補選呀大佬，鬥票數打生打死呀，友誼第一，比賽第二咩？一方面chok樣合十（著西裝chok樣已經想講「做咩啫你」），一方面又惡言相向爭選票，他自己又有理說不清，做咩啫你。
郵寄告急宣傳單張給選民，但又無貼郵票，是否急到忘記寄信要郵票，做咩啫你？選舉經費要選民自費，呢筆數點計？明明工聯會和民建聯同樣收阿爺錢，但路線稍稍不同，政治忠誠大，抑或打工權益大？標準工時呢？男士侍產假呢？取消強積金對沖呢？到時又chok樣，雙掌又合十，講句打和啦Super？入籍借力無衝突？鄧家彪就如他的合十一樣，毫無智慧，造作！
本來，我好同情鄧家彪呀。為甚麼他要參加補選？因為今屆立法會選不上囉。為甚麼他選不上？因為輸給容海恩之流囉，因為最後階段中聯辦力撐容海恩囉。鄧家彪對容海恩，原本我會寧願鄧家彪，如今單單是他的合十，加上一連串做咩啫你的行為，似乎馬海倫又秤先番少少。
雙掌合十，印度很常見。朋友，你返去印度食蕉啦。
圖片來源:互聯網、Bill Tang@Facebook